Wikipedia, dat Nakieksel, dat vun de Lesers schreven warrt

Dat Nakieksel Wikipedia warrt vun siene Lesers schreven. So schall dat wesen. Jeder, de wat weet kann en Artikel bi Wikipedia schrieven oder Fehlers verbetern, wenn he jem finnt. Klingt good un eenfach. Is egentlich ok eenfach. Aver de Realität sütt liekers anners ut.

Nepal, de Staat in't Himalaja, will an'n 10. April sien ne'e Verfaten verafscheden un schall denn vun de Staatsform offiziell en Bundsrepublik wesen. Nu hebbt welk Lüüd dat jümmer en beten hild un so hett een in den hoochdüütschen Wikipedia-Artikel to Nepal al in'n Januar rinschreven, dat dat en Bundsrepublik is. De Artikel dee nu anfangen mit: Die Bundesrepublik Nepal ist ein Staat in Südasien. Den Fehler hett gau een markt un dat Bundesrepublik wedder rutstreken. Weer ja noch nich so wied. Aver dat lütte Woort Die is em dör de Lappen gahn. De Artikel güng nu so: Die Nepal ist ein Staat in Südasien. Wat Tüdelkraam is, denn Nepal is keen Deern un ok nie wesen. Na, nu weer glieks dat allereerste Woort in'n Artikel verkehrt. Dor mutt doch dat Wiki-Prinzip griepen un een vun de Lesers sütt dat un betert dat ut. Kann nich alltolang duurn, oder?

Na, glööv dat man. Vun'n 13. Januar bet vundaag, den 1. April (un dat is ganz gewiss keen Scherz) hebbt luud http://stats.grok.se/ so bi 70.000 Minschen den Artikel opropen. Keeneen hett sik de Möh maakt un den Artikel utbetert. Hett dat keen markt oder hebbt se keen Lust hatt, dat uttobetern? Villicht hebbt se sik wunnert un dat liekers stahn laten (Wenn dat in Wikipedia steit, denn is Nepal villicht doch en Deern...)? Ik weet dat nich. Vundaag heff ik den Artikel op jeden Fall utbetert. Leser Nr. 70.001 hett dat richt. Dat Wiki-Prinzip geit doch. Na en Tiet kummt en Leser un betert de Fehlers ut....