Platt in Medien. oder: Keen Platt in de Medien.

Der Spiegel hett disse Week en Artikel över Pomerode bröcht. Pomerode, dat is ene Stadt in Brasilien, de 1865 vun Lüüd ut Pommern grünnt worrn is. Un disse Lüüd ut Pommern pleegt ok noch vundaag jemehr ole Traditionen. Dormit is Pomerode nu siet Enn vun'n Tweten Weltkrieg de eenzige kulturell pommersche Stadt op de Welt (Vörpommern tell ik nu mal nich mit, dat höört ja kulturell dichter bi Mekelborg as bi den Rest vun dat ole Pommern).


Der Spiegel hett nu lang dor över schreven, wie de Lüüd in Pomerode jemehr Kultur plegen, jemehr Egenheiten un ok jemehr düütsche Spraak. Jo, düütsche Spraak, dor weer nämlich blot vun Hoochdüütsch de Reed bi'n Spiegel. Keen Woort dorvun, dat Pomerode vundaag de eenzige Stadt op de Welt is, de noch dat pommersche Platt bruukt. Merrnmank in Brasilien is dor en Stadt in de Lüüd noch Pommernplatt snacken doot un den ullen Spegel intresseert dat keen Stück. Plattdüütsch is polietsch offiziell goodkennt dör de Sprakencharta, aver in de Öffentlichkeit is dor noch nix vun ankamen. För de is Plattdüütsch nich mal nennenswert. Dömeligen Dörpsdialekt.