Plattdüütschland: Dor, wo in dat Johr 2100 de Pelikaans in't Watt dükert

Plattdüütschland: Dor, wo in dat Johr 2100 de Pelikaans in't Watt dükert. Nee, ik snack nich vun Neewark un Pellworm. Ik snack vun dat Kehdinger Watt un dat Eiderwatt. Woneem hüdigendaags noch swartbunte Kei op de Masch graast, dor schall in hunnert Johr de Pelikaan swemmen.

De Eer warrt jümmer warmer. Drievhuusgas. Jo. Dat Ies smölt un de See stiggt höger. Glöövst du nich? Bewiesen kann ik't nich. De een Lüüd seggt so, de annern seggt wat anners. Ok de Wetenschopslüüd sünd sik nich enig. Welk seggt, dat dat allens ganz normal is, mit'n Klimawannel. Recht hebbt se. Klimawannel is normal. Aver wat helpt uns dat, wenn sik dat Klima ganz normal wannelt. Wenn de See ganz normal stiggt. Un de Lüüd versuupt. Ganz normal...
Jo, de Mammuts un Wullnaashöörn un Säbeltähntigers, de sünd eenfach weglopen, wenn dat Water keem. Müssen nich mal lopen, keem ja man ganz suutje. Poor Zentimeter in't Johr. De Beester ut de Oortiet kunn dat egal wesen. Wi Mischen hüüt köönt ok eenfach weggahn, wenn dat Water kummt. Aver wi mööt wat trüchlaten. De Minsch hett sik Dörper un Städer boot. Un he hängt an disse Öörd. Dat Mammut hett den ganzen Dag Gras freten. Dat Mammut is dat eendoont, wat dat Gras in Finnland oder in Kroatien wasst. Gras is Gras. De Minsch mutt aver Opper bringen. Wenn dat Meer stiggt, denn mööt wi Hamborg villicht opgeven. Lübeck, Bremen, Groningen, Venedig, New York un wat nich allens.

Dat de See stiggt, dat is ganz normal. Hett se jümmer daan. Un is denn ok wedder fullen. Kiek mal op dat Bild rechts. Dat is meist ungewöhnlich, wenn de See nich stiggt oder fallt. 24.000 Johr vör uns Tiet weer de See noch över 120 Meter sieder as vundaag. 120 Meter! Kunnst to Foot na England lopen. Siet 7000 Johr hett sik bi'n Meersspegel meist nix mehr daan. So'n Stabilität hett dat ans noch nich faken geven. Wenn dat nu aver wedder anners warrt... Wat maakt wi denn? Wenn de See teihn Meter stiggt, denn is Seefohrt meist nich mehr mööglich. De Havens sünd denn all ünnergahn. Wenn de See teihn Meter fallt, denn liggt de Havens all op't Dröge.

Wi maakt uns hüüt de Köpp hitt över de Fraag: Elv utbaggern, dat de groten Pött in'n Hambörger Haven kaamt, oder nich? Is dat nich kortsichtig? Disse Fraag is doch würklich schietegal, wenn de Meersspegel sik ännert. Denn blifft vun Hamborg villicht gornix na.

Ik weet dat nich. Villicht is dat Kahlendioxid gornich so slimm. Villicht is Kehdingen in hunnert Johr noch jümmer dröög un de Pelikaans sünd in Noorddüütschland noch jüstso roor as vundaag. Aver dor ganz unafhängig vun: Schöölt wi noch en poor mehr Gedanken för de Tokumft opwennen, för den Klimawannel? Ok en natürlichen Klimawannel kann uns swoor drapen. Wi sünd wohrschienlich all dood, wenn Hamborg op'n Seegrund liggt oder villicht Helgoland opmal op't dröge Land liggt. Aver dat dat nich so kummt, dat is en Generationenopgaav. Dat is in de Levenstiet vun en enkelten Minsch gor nich to schaffen. Dorüm mööt wi nu anfangen. Uns tominnst Gedanken maken.

PS: Een Saak will ik man gau noch dorto seggen: Is villicht wichtig för de Flucht, wenn de grote Floot kummt ;-) Dat Ies, dat op Gröönland un in de Antarktis spiekert is, wenn dat smölten deit, denn reckt dat, dat de See üm un bi 73 Meter stiggt. Wenn de Floot kummt, mööt ji opbest na'n Harz gahn. Vun Köln af an is ok seker. Gaht nich na'n Noorden! Vun Däänmark blifft blot en poor Sandknüllen över, de ut dat Water kiekt! Dat reckt nich för fief Millionen Lüüd. För de Lüüd ut Mekelborg-Vörpommern dee sik de Ümgegend vun Dresden anbeden. Nich Dresden sülvst, dat liggt in dat Elvdaal, dat is to dicht bi't Water! Veel Erfolg bi de Jachd op de letzten drögen Plätz!