Vörstellt: Plattdeutschland.com

Plattdeutschland.com: Disse Websteed deit sik mit de Plautdietschen befaten. De Plautdietschen, dat sünd Plattdüütsche, de in de Tiet üm 1800 ut religiöse Grünn (se weren Mennoniten un dorvun Pazifisten un wullen keen Wehrdeenst maken) ut Preußen utwannert sünd. Se sünd na Russland gahn un hebbt dor ne'e Dörper grünnt. Jemehr preußisch Plattdüütsch hebbt se bibehollen (ok wenn sik dat mit de Tiet en beten verännert hett). Ok in Russland in de Tiet vun'n Zar schullen se later denn Wehrdeenst maken un welk vun de Plautdietschen hebbt sik wedder en ne'e Heimat söcht. In de Sowjetunion gellen se denn (ofschoonst se ja man Pazifisten weren un sounso blot eenfache Buurn) as Düütsche un dormit ok gliek as potentielle Nazi-Frünn. In'n Tweten Weltkrieg müssen veel Plautdietsche jemehr Heimat verlaten. Welk sünd in Russland bleven un na Sibirien trocken. Annere sünd in de USA oder na Kanda gahn oder hebbt in Paraguay, Mexiko un Belize ne'e Kolonien opboot. Un se snackt noch vundaag Hoochdüütsch in de Kark un Plattdüütsch tohuus.
As de Sowjetunion tohoopbraken is, sünd veel Plautdietsche ut Russland na Düütschland trocken. Vun de 500.000 Plautdietschen op de Welt leevt hüdigendaags bi 200.000 in Düütschland, veel dorvun in Oostwestfalen-Lippe. Vun de Öffentlichkeit warrt se mehrsttiets blot as Russlanddüütsche wohrnahmen un dat veel vun jem Plattdüütsch snacken doot, dat weet kuum een.
So, noog vun de Historie. Gifft noch veel mehr to vertellen, aver nich nu. De Websteed Plattdeutschland.com hannelt nu nich vun de Historie vun de Plautdietschen, de is för de jungen Plautdietschen in Düütschland. Klönen un Snacken över dit un dat un mit anner Lüüd tohoopkamen. Plattdeutschland.com is en sozialet Nettwark. Wat StudiVZ för Studenten is, dat is Plattdeutschland.com för Plautdietsche. Dat gifft Plattdeutschland-Partys un veel Biller warrt wiest. Dat gifft Foren un allerhand annern Kraam to'm Tietverdriev. Ünner 'Radio' un 'Plautcast' gifft dat ok Plautdietsch to'n Anhöörn.