Politikers sünd so rechte Aktivisten

Plattdüütsch is en wichtigen un integralen Deel vun de Kultur vun uns noorddüütsche Heimat. Dat hett nu ok de Landkreis Stood mitkregen un will wat doon. En Symbol setten, wo wichtig de plattdüütsche Spraak is. Aver wie schall een dat anstellen? Jo, de Kreisdag schall Platt snacken! So hebbt de Lüüd in'n Kreisdag dat beslaten. Wenn dat keen Signal is! Plattdüütsch is ok för Politik to bruken. Feine Idee, segg ik.
Aver de Düvel steckt in de Details, nich wohr. Den Kreisdag op Plattdüütsch gifft dat blot eenmal in't Johr. Un dat se de Sitzung kumplett op Platt maakt, nee, dor hebbt se keen Mehrheit för kregen. Nee, een Punkt op de Tagesordnung schall dat nu wesen, de op Platt besnackt warrt. Naja, un de Amtsspraak is nu mal Hoochdüütsch, de schrevene Vörlaag schall ok blot Hoochdüütsch wesen, alleen ut rechtliche Grünn, ne. Naja, un denn schall ok nüms utslaten warrn, dascha gewiss; 'keen keen Platt snackt, dröff natürlich ok Hoochdüütsch snacken. (Eenfach gewisse Spraken utsluten, dat ischa ok meist totalitär, oder nich? Dat geit ja nich.)
Aver ans dröffst free rut Platt snacken as Kreisdagsafornter! En fein Symbol, dat so richtig wiest, wo wichtig de Politik Platt as Deel vun uns kulturell Arv un Identität nimmt! So kummt de Spraak vöran. Besten Dank, leve Stoder Politikers!